Bıylǵy merekeli jyly Kókshe jurtshylyǵy qoǵamdyq ómirdiń barlyq salasynda ıgi bastamalarymen el nazaryn aýdarýda. Sonyń biri retinde sportshy muǵalimder Qalıbek Ábilov pen Balǵabaı Qulpeıisovtiń Qazaq handyǵynyń 550 jyldyǵy qurmetine 550 shaqyrymdyq sapar bastaýyn aıtar edik.
Marafonshy azamattar tálimdik shara aıasynda Býrabaıdaǵy Abylaı han alańynan Qaraǵandy oblysyndaǵy «Ulytaý» ulttyq tarıhı-mádenı jáne tabıǵı qoryq murajaıyna deıin jaıaý júrip ótpek. Táýelsiz Qazaqstan Respýblıkasynyń jáne «Nur Otan» partııasynyń týlaryn asqaq kótergen jigitterdi Aqmola oblysynyń tanymal tulǵalary men «Jas Otan» jastar qanatynyń belsendileri, qalyń jurtshylyq aıryqsha saltanatpen shyǵaryp saldy.
– «Nur Otan» partııasy óz eliniń tarıhyn dáripteýmen qatar, salamatty ómir saltyn qalyptastyrýdy nasıhattap júrgen azamattardy árqashan qoldap, demeýshilik kómek kórsetip otyrady, – dedi partııanyń Aqmola fılıaly «Jas Otan» qanatynyń jetekshisi Janargúl Júnisova. – Mundaı tanymdyq sharalar jastar boıynda patrıottyq rýhty qalyptastyryp, tarıhı oqıǵanyń mańyzyn qalyńdata túsedi.
Marafonshylar sapar barysynda Qazaq handyǵynyń qalyptasýynda ózindik tarıhı orny bar eldi mekenderde bolyp, turǵyndarmen kezdesýler ótkizedi. Olar aldymen Aqmola oblysynyń Bulandy, Shortandy, Selınograd, Qorǵaljyn aýdandaryndaǵy mádenı-kópshilik sharalarǵa qatysyp, Astana, Shubarkól, Jezqazǵan, Sátbaev qalalarynyń turǵyndarymen qaýyshady.
Ulytaýǵa jasalǵan uly sapar sátti aıaqtalatynyna senim mol. О́ıtkeni, kókshelik qos jelaıaq buǵan deıin Qurmanǵazy, Abaı, Bógenbaı batyr mereıtoılaryna, Túrkistannyń 1500 jyldyǵyna, Qazaqstan Táýelsizdiginiń 10 jyldyǵyna jáne Abylaı hannyń 300 jyldyǵyna arnalǵan marafondyq mereıli mejege abyroımen jetkeni el esinde.
Baqbergen AMALBEK,
«Egemen Qazaqstan».
Aqmola oblysy.